Rimerien We gään wat schriw van Düt un Dat in sine Spraok, dat olle Plat, un auk an Riemsels döt sik waogen, dän häöers wisse äs maol fraogen: "Wat riemt sik up dat leste Waod? Ik häb´t vödorri jüst nich praot." Män in dän Kop, äs em dat schint, dao mot et sien, wat he nich fint! Nu gait et los, dat Raoden, Söken. Vötwiëwelt fäng he an to flöken: "Dao wäer mi nao ener klook!" smit aal dat Wiärks in'n lesten Hook. Mi düch, wan he düt Bööksken had, wat vul met Wäöder is in Plat, lait sik dat Riemwaod wisse finnen, dat Riemsel gau to Enne spinnen, bol van alleen, aon graut Gedo, mok Fraide em un us daoto.